Maja është një perëndeshë e lashtë lindore që përfaqëson iluzionin. Iluzioni luan me shqisat tona e ne marirm pjesë, të vetëdijshëm ose jo, në lojën e tij. Iluzioni nuk është detyrimisht diçka që nuk ekziston, meqënëse ne e perceptojmë si të tillë. Lojërat e iluzionit bazohen në gjëra të vërteta, por jo jetëgjata.

Shumëllojshmëria e temave të prekura në këtë libër përshkohet nga një frymë bashkimi që i jep gjallëri kapitujve. Në to kurrë nuk humbet toni optimist mbi fushën e madhe të shahut të realitetit; gurët e lëvizshëm rrëshqasin herë këtu e herë aty në lojën e madhe të Majas, ku e rëndësishme nuk është të fitosh, por të luash për tu ndjerë i gjallë dhe për të përjetuar eksperienca.